Foto’s en Video’s

’t zeen raar daag in deze COVID-19 tied ( oftewaal Corona- tied).

Zo waar òs eige hauwf-vastefees op 21 maart ein van de eesjte feeskes in ’t dörp dat helaas geine doorgangk haet kénne vénje. Mer ouch väöl ivenemente van vereiniginge in Lömmerich kénne neit plaats gaon vénje, zowiej van sjötterie Sint Salvius, die hauwe ein bòndsjfees in de plenning sjtaon, woo gans Lömmerich al euver kalde. Meziekvereiniging de Vriendenkring hauw ein sjoon jeugkònzert geplend. Mer nog väöl meer ivenemente en feeskes woo òs dörp zo vol van is, kénne neit doorgaon. Kaffee Salden en ’t kesjteel gònge allebei toew op gezag van de politiek. De kénjer kénne neit nao sjool en väöl luuj zeen thoes, of wirke van thoes oet.

Wiej lang ’t allemaol geit doere, ként nemes zégke……

Mer waat deis te noew de ganse daag? Veer zeen de digitale kas ingedaoke en höbbe get filmkes en foto’s verzameld en höbbe aan ‘t “media menuuj” ein paar nuuj rubrieke toegevoug.

In “oet de auw doos” kòmme foto’s en video’s van vruiger te sjtaon.De revuuj van 1983 sjteit dao al op, mit dank aan Marcel Vleeshouwers veur zien biejdrage. In de kòmmende waeke kòmme dao nog get revuujs van vruiger biej. Ouch de foto’s zulle de kòmmende waeke gevöld waere.

Zout geer nog get laege tied euver höbbe en matterjaal van vruiger höbbe, laot òs dan get weite. Veer zétte dat gaer op òzze website.

Veur noew wunsje veer jederein väöl sjterkte toew mit alle beperkinge.

Blief thoes, hauwt aafsjtandj en blief gezòndj

Scroll naar boven