Vastelaovend vierste same!
En sjus dat samezeen is in deze vraeme tied mit inachnumming van alle richliene erg lestig. Daorom höbbe veer nao goud euverlégk besjlaote de kómmende vastelaovend angesj te gaon viere és geer van ós gewend zeet.
Op de ellefde van de ellefde zulle veer ‘t seizoen, op ein gepaste wies äöpene en op vastelaovesdénsdig zulle veer dit, veur ós allemaol onwirkelikke, vastelaovessezoen ouch op ein passende menaer aafsjloete. Dit uiteraard allemaol in naolaeving van de op dat momént géldende euverheidsrichliene.
In de tösjeligkende tied zulle veer de vastelaovend vanoet de achtergróndj bewake, v’r numme gein aafsjied van ózze Prins Harrie en ouch ós jeugPrinsepaar Vinz en Myrthe blieve regere pes ‘t momént dat veer weijer mit zien alle bie ein kenne kómme.
Uiteraard zulle veer ós ouge en ore aope blieve hawte en zulle veer dao wo muigelikhede zeen ós kanse pakke om op ein passende menaer same ózze sjone Lömmerichse vastelaovend te belaeve.Blief ós faceboukblaadzie in de gate hawte veur de de létste ontwikkelinge en hawt uch veural gezóndj!
